ಪ್ರಸವಾನಂತರದ ಖಿನ್ನತೆ: ಕಲ್ಪನೆಗಳು ಮತ್ತು ವಾಸ್ತವಗಳು

ಮಹಿಳೆಯರು ಅನೇಕ ರೀತಿಯ ಖಿನ್ನತೆಯನ್ನು ಅನುಭವಿಸುತ್ತಾರೆ. ಅಂತಹ ಖಿನ್ನತೆಗಳಲ್ಲಿ ಪ್ರಸವಾನಂತರದ ಖಿನ್ನತೆಯೂ ಒಂದು. ಪ್ರಸವಾನಂತರದ ಖಿನ್ನತೆಯ ಕುರಿತಾಗಿ ಅನೇಕ ಕಲ್ಪನೆಗಳಿವೆ. ಆದ್ದರಿಂದ ಖಿನ್ನತೆ ಯಕುರಿತಾದ ವಾಸ್ತವಾಂಶಗಳನ್ನು ತಿಳಿದುಕೊಳ್ಳುವುದು ಅತಿ ಅಗತ್ಯ. ಅದರ ಮಾಹಿತಿಗಾಗಿ ಈ ಲೇಖನವನ್ನು ಓದಿ..

ಕಲ್ಪನೆ: ದುಃಖದ ಭಾವನೆಗಳನ್ನು ನಿರ್ಲಕ್ಷಿಸಿದರೆ ಅಥವಾ ಸಕಾರಾತ್ಮಕ ಭಾವ ರೂಢಿಸಿಕೊಂಡರೆ ದುಃಖದ ಭಾವ ದೂರವಾಗುತ್ತದೆ.

ವಾಸ್ತವ: ಪ್ರಸವಾನಂತರದ ಖಿನ್ನತೆ ಕೇವಲ ದುಃಖದ ಭಾವನೆ ಮಾತ್ರವಲ್ಲ, ಬದಲಿಗೆ ಇದೊಂದು ದೊಡ್ಡ ಅನಾರೋಗ್ಯದ ಸಮಸ್ಯೆ. ಇದಕ್ಕೆ ಚಿಕಿತ್ಸೆ ಅಗತ್ಯ.

ಕಲ್ಪನೆ: ನಾನು ದುರ್ಬಲ ವ್ಯಕ್ತಿ, ಆದ್ದರಿಂದ ನನಗೆ ಹೆರಿಗೆಯ ನಂತರದ ಖಿನ್ನತೆಯ ತೊಂದರೆಯಿದೆ.

ವಾಸ್ತವ: ಪ್ರಬಲ ಮತ್ತು ಬುದ್ಧಿವಂತ ಸ್ತ್ರೀಯರು ಕೂಡ ಈ ರೀತಿಯ ಖಿನ್ನತೆಯಿಂದ ಬಳಲುತ್ತಾರೆ. ಇದಕ್ಕೆ ನಿಮ್ಮ ದೌರ್ಬಲ್ಯ ಅಥವಾ ಸೋಲು ಮಾತ್ರ ಕಾರಣವಲ್ಲ.

ಕಲ್ಪನೆ: ನಾನು ಹೆರಿಗೆಯ ನಂತರದ ಖಿನ್ನತೆಯ ಸಮಸ್ಯೆಗಾಗಿ ಔಷಧ ತೆಗೆದುಕೊಂಡರೆ ಮಗುವಿಗೆ ಹಾಲುಣಿಸಲು ಸಾಧ್ಯವಿಲ್ಲ.

ವಾಸ್ತವ: ಮಗುವಿಗೆ ಹಾಲುಣಿಸಲು ತೊಂದರೆಯಾಗದಂತಹ ಚಿಕಿತ್ಸೆ/ಔಷಧಗಳನ್ನು ನೀಡಲಾಗುತ್ತದೆ. ಇದರ ಬಗ್ಗೆ ಆರೋಗ್ಯ ಸಲಹೆಗಾರರು ಅಥವಾ ವೈದ್ಯರಿಂದ ಸಲಹೆ ಪಡೆಯಿರಿ..

ಕಲ್ಪನೆ: ಮಗು ಜನಿಸಿದ ಮೊದಲ ಕೆಲವು ತಿಂಗಳಿನಲ್ಲಿ ಮಾತ್ರ ಈ ಖಿನ್ನತೆಉಂಟಾಗಬಹುದು.

ವಾಸ್ತವ: ಈ ಖಿನ್ನತೆಯು ನೀವು ಗರ್ಭಿಣಿಯಾಗಿದ್ದಾಗ ಅಥವಾ ಮಗು ಜನಿಸಿದ ಒಂದು ವರ್ಷದ ಅವಧಿಯಲ್ಲಿ ಯಾವಾಗ ಬೇಕಾದರೂ ಉಂಟಾಗಬಹುದು.

ಕಲ್ಪನೆ: ಮೊದಲ ಮಗು ಜನಿಸಿದ ಸಮಯದಲ್ಲಿ ಖಿನ್ನತೆ ಇರಲಿಲ್ಲ. ಆದ್ದರಿಂದ ಇದು ಮುಂದಿನ ಮಗುವಿನ ಜನನದ ಸಮಯದಲ್ಲಿ ಉಂಟಾಗುವುದಿಲ್ಲ.

ವಾಸ್ತವ: ಪ್ರಸವಾನಂತರದ ಖಿನ್ನತೆಯು ಎರಡನೇ ಅಥವಾ ಮೂರನೆಯ ಮಗುವಿನ ಜನನದ ಸಮಯದಲ್ಲಿಯೂ ಉಂಟಾಗಬಹುದು.